NAGA CITY-Dead on the spot an sarong katao mantang irido man an saro pa sa salpukan kan motorsiklo asin pampasaherong bus sa kalabaan kan Diversion Road, Triangulo, Naga City pasado alas-3:34 nin mag-uumagahon kasubago.
Binisto an nagadan na si Paulo Barbiran, 36-anyos, backrider kan motorsiklong minamaneho kan nairidong si Anthony Soriano, 23-anyos.
Sa nagunong impormasyon kan Bombo Radyo Naga, napag araman na nabulaga suboot an driver kan Raymond Bus na si Ricky Español kan bigla na sanang kakanon kan motorsiklo an saiyang linya antes na dagos na magsalpok sa minamaneho niyang lunadan.
Napag-aramang biyaheng Sorsogon gikan Maynila an bus mantang gikan man sa Almeda Highway.
Sa kusog kan pagsalpok, naka-apon suboot si Barbiran antes na nagpairarom sa nasambitan ng bus na naging rason tanganing magsapo ini nin malalang tama sa saiyang lawas.
Napiripit man an walang parte kan saiyang tabay na dikitan pang masuhay sa saiyang lawas.
Sa ngunian, nasa punerarya na an biktima mantang padagos na mang binubulong sa ospital an driver kan motorsiklo.
