NAGA CITY- Nahahampang sa kasong Reckless Imprudence Resulting to Homicide and Damage to Property an sarong 60-anyos na driver makalihis an nangyaring aksidente na ikinagadan kan sarong motorista sa Barangay Malabanban Sur, Candelaria, Quezon.
Binisto an suspek na si Roberto Lagat na presenteng nakaistar sa banwaan nin Lagonoy, Camarines Sur.
Nagluluwas sa imbestigasyon kan Candelaria-PNP na pinapa-atras ni Lagat an minamanehong Isuzu Tractor Head para makalaog sa San Juan road kan aksidente ining mabangga kan motorsiklong minamaneho ni Jeffrey Escobar, 29-anyos.
Dead on the spot si Escobar huli sa labing lugad na pigsapo sa payo asin lawas.
Nadanyaran man an saiyang motorsiklo huli sa kusog kan pagkakabangga.
Nasa pangangataman na kan Candelaria-PNP an suspek mantang nagpapadagos an imbestigasyon sa insidente.
