Inako kan Department of Education (DepEd) an literacy crisis sa nasyon makalihis na magluwas sa sarong assessment na 87% kan mga Grade 11 students an nadedepisilan pa man giraray sa pagsabot kan saindang binabasa.
Segun sa DepEd, indikasyon an nasabing numero kan haloy nang learning gaps sa sistema nin edukasyon kan Pilipinas asin bako sanang problema sa mga senior high school.
Sa sarong pahayag ni DepEd Undersecretary for Learning Systems Carmela Oracion, nanindugan ini na seryoso an resulta kan Second Congressional Commission on Education (EDCOM 2) kan ahensya.
Pig-eksplikar kan opisyal na natipon na an problema sa reading skills poon pa kan enot na mga grado asin naggrabe sa lawig nin panahon huli sa manlaen-laen na bagay arog kan katibaadan, kakulangan nin learning materials, limitadong suporta sa harong, delay sa klase, asin an epekto kan pandemya.
Segun sa opisyal, dae pwede na saro sana an kawsa kan literacy crisis kundi sistematikong problema sa edukasyon sa nasyon.
Bilang kasimbagan, nag-implementar an DepEd nin summer remediation program para sa mga senior high school students na nakatalagang matapos ngonian na semana.
Pighahanda man kan ahensya an mga bagong literacy assessment antes an pagbukas kan klase ngani na mabisto an mga estudyante na nangangaipo nin dagdag na suporta asin tutoring.
Sinabi man kan DepEd na iiba sa bagong three-term school calendar an mga remediation asin enrichment activities tanganing mas masimbagan an mga learning gaps sa bilog na school year.
Aminado man an ahensya na mantenidong angat an magabat na trabaho kan mga paratukdo sa ibong kan mga repormang pigpapautob.
