Naghagad si Bise Presidente Sara Duterte sa Senate Impeachment Court na ibasura an mga Articles of Impeachmen laban saiya, na nagtutulod na igwa sinda kan inaapod niyang “malulubhang depekto” sa konstitusyon, proseso, asin nilalaman.
Sa halawig na kasimbagan na isinumiter kan saiyang mga abogado kan Lunes, Hunyo 1, sinabi ni Duterte na an reklamo soboot dae nakakaabot sa standards na pighahagad kan Konstitusyon asin, sosog digdi, dapat na i-dismiss.
Susog sa saiyang kampo, “An mga Artikulo nin Impeachment nagtitios nin mga depekto sa konstitusyon, prosedimiento, asin substantibo. Dai ninda napapanigoan an mga pamantayan na hinahagad kan Konstitusyon asin, susog kaini, dapat na ibasura,” kaya kulang nin supisyenteng basehan tanganing magpadagos.
Saro sa mga mayor na argumento kan depensa iyo na an House Committee on Justice soboot naglampas sa awtoridad kaini pagkatapos na magkondukta kan inaapod nindang “mini-trial” sa pagdangog kan kaso, na sabi ninda bakong susog sa maninigong proseso.
Dugang pa kan kampo kan Bise Presidente na an Kamara sana an may kapangyarihan na magpoon nin impeachment proceedings, mantang an Senado an may katungdan na magdangog asin magdesisyon sa kaso, kaya dapat na malinaw an separasyon kan mga trabaho.
Idinugang pa ninda na binalgar suboot an due process huli sa may iprinesentar na bagong ebidensya durante kan hearing na bakong parte kan orihinal na reklamo, rason na mawaran siya nin magkakanigong oportunidad na masimbag nin tama an mga alegasyon kontra saiya.
