Nakakua an Pilipinas nin kinakarkulong US$2.5 bilyon na investment commitments hale sa mga kompanya sa Canada sa larangan kan pagmimina, enerhiya, information technology (IT), business process management, asin digital economy.
Ipinagmalaki ni Pangulong Ferdinand R. Marcos Jr. an nasabing mga pamumuhunan na dakulang tabang tanganing lalo pang mapalago an ekonomiya kan nasyon.
Sa sideline kan saiyang official visit sa Canada, nakipagpulong an Presidente sa nagkapirang darakulang kompanya sa Canada na nagpahayag nin interes na mamuhunan sa Pilipinas.
Padagos an negosasyon kan Malacañang para sa posibleng free trade agreement kan Pilipinas asin Canada tanganing lalo pang mapakusog an ekonomiya kan duwang nasyon.
Natukar sa pagbisita kan Presidente an posibilidad kan Artificial Intelligence o AI hubs asin training centers sa nasyon tanganing mapakusog an kasanayan kan AI workforce.
Inomaw man ni Presidente Marcos an padagos na suporta kan Canada sa rules-based international order asin United Nations Convention on the Law of the Sea (UNCLOS), lalo na sa isyu kan South China Sea.
Dati nang inanunsyo ni Pangulong Ferdinand R. Marcos Jr. na itinaas na sa strategic partnership an relasyon kan Pilipinas asin Canada kasunod kan saiyang official visit.
Segun sa Presidente napagkauruyonan kan duwang nasyon na lalong pararumon an kooperasyon sa siguridad, kalakalan, enerhiya, teknolohiya, asin iba pang sektor kaiba si Canadian Prime Minister Mark Carney, mga opisyal asin negosyante.
