NAGA CITY- Sugatan ang dalawang menor de edad matapos bumangga ang sinasakyang bisekleta sa isang truck sa Libmanan, Camarines Sur.
Sa panayam ng Bombo Radyo Naga kay LtCol. Pobleo Magistrado ng Libmanan-PNP, kinilala nito ang mga menor de edad na sila Jaymart Ranada at angkas nito na si Jay-R Ramirez parehong 17-anyos.
Ayon kay Magistrado, nawalan ng kontrol ang bisekleta na sinasakyan ng dalawa hanggang bumangga ito sa truck na minamaneho naman ni Roger Avelino.
Agad namang dinala sa ospital ang mga menor de edad matapos magtamo ng sugat sa iba’t ibang bahagi ng katawan.
Sa ngayon, nagpapatuloy pa ang imbestigasyon ng mga otoridad sa nasabing insidente.
