NAGA CITY– Gadan an tolo katao mantang iridu naman an pitong iba pa sa salpukan kan jeep asin van sa Maharlika Highway, Balubad, Atimonan, Quezon.
Binisto an mga nagadan na sinda Luisito Sarte, Segundina Llamado asin Lizza Llamado na anas mga taga Pasacao, Camarines Sur.
Sa entrevista kan Bombo Radyo Naga ki PCI Michael Encio, Chief of Police kan Atimonan-PNP, sinaysay kaini na enot soboot sindang nagresponde sa aksidente na kinaembweltuhan kan sarong mixer truck sa nasambitan ng lugar.
Nasa gilid na soboot an mixer truck, kan likayan ini kan jeep na minamaneho ni Edwin Martinez alagad dae kaini nahiling an papaaboton na van na minamaneho naman ni Luisito Sarte na nagresulta para maghead on collision an duwang lunadan.
Katakod kaini, napuruhan an driver kan van asin an duwa kaining pasahero mantang idinalagan man sa ospital an anom na iba pa kaibanan an driver kan jeep.
Sigon ki Encio, burat soboot an driver kan jeep kan mangyari an insidente.
Sa ngunian, nagpapadagos pa an imbestigasyon kan mga otoridad mantang nagpaparahay pa sa ospital an mga nairidung pasahero.
