Aram baya nindo mga kaBombo, napapatotoohan kan tulong madre sa Austria an kasabihan na dipisil talagang baguhon an nakatuodan. Nagibong magtakas kan nasambitan ng tulong madre gikan sa saindang retirement home asin nagbalik sa saindang dating kumbento.
An mga madre an retired na asin an kumbento an saindang nagin istaran sa laog kan labi sa anom na dekada.
Sinda Sister Bernadette, 88 anyos; Sister Regina, 86 anyos; asin Sister Rita, 82 anyos an huring tulong madre sa nasambitan ng kumbento.
Basado sa report, ini an nagsirbing istaran asin lugar kun saen sinda nagin paratukdo huli ta saro man ining pribadong eskwelahan para sa mga kababaihan magpuon pa kan nakalihis na taong 1877.
Hasta sa napiritan sindang pabalyuhon sa sarong Catholic care home kan nakalihis man na December 2023, makalihis na mag-take over an Archdiocese of Salzburg asin Reichersberg Abbey sa establisyemento kan taong 2022.
Pighurot ni Sister Bernadette na tinawan sinda nin karapatang magtinir sa kumbento hasta sa saindang kagadanan, alagad ini an soboot dae tinupad. Sigun ki Sister Rita, pirme ining namumundo sa retirement home asin labi an saiyang kaogmahan na nakapuli na sinda.
Maduong pigkontrahan ni Provost Markus Grasl kan Reichersberg Abbey, superior kan mga madre, an saindang pagbabalik.
Sa ibong kan pagtutol kan simbahan, nagtitinir an tulong madre sa kumbento.
Bahagyang naibalik na an kuryente asin tubig, asin pigdadarahan sinda nin pagkakan asin ibang mga pangangaipuhan kan saindang mga tagasuporta, kabali na an saindang dating estudyante.
Nagpasiring na man an mga doktor tangani hilingon an saindang kamugtakan.
