Aram baya nindo mga ka-bombo, sarong pambihiran trayumpo an naabot kan sarong 3 years old na aki sa Florida, US, makalihis na bistuhon kan Guinness World Records komo pinaka-joven na motivational speaker (male) sa bilog na kinaban.
Sa murang edad nakakapagtao na si Caleb Stewart nin makabuluhang talumpati mapadapit sa importansiya ka n pagtitiwala sa sadiri, na isinagibo sa hampangan ka komunidad kan ALARM International Church sa Tallahassee, Florida.
Sigun ki Caleb, dae kaini malilingawan an mainit na pagresebir sa saiya kan mga tapagdangog kan saiyang enot na pagtaram.
Puon kaidto, dae na ini nagpundo sa pagheheras nin inspirasyon.
Ngunyan, naglilibot ini sa manlaen-laen na eskwelahan, simbahan, asin mga grupo tanganing enkaminaron an mga kaakian na mangarap, magtiwala sa sadiring kakayanahan asin padabaon an pagbabasa.
Apwera sa saiyang mga talumpati, naglunsar man si Caleb nin sarong non-profit library na pig-apod na Master Caleb’s Discovery Library, kun saen nagheras ini nin mga libro asin kagamitan sa pagbabasa sa mga aking nangangaipuhan.
Obheto kaining ma-enkaminar an mga aki na magpuon na magbasa asin pagyamanon an saindang kaaraman huli ta nagtutubod ining an pagbasa an susi sa trayumpo.
Dakula man an suporta asin inspirasyon na nakukua ni Caleb gikan sa saiyang pamilya, orog na sa saiyang lola na nagtatabang sa saiyang pag-eskwela asin pagpreparar sa mga talumpati.
Sa ibong kan saiyang natatanging kakayanan, siring ma ini sa ibang aki na mahilig magkawat nin basketball asin video games, asin naggugugol nin oras kaibahan an pamilya.
Pangarap ni Caleb na magin paratukdo, coach asin magpatindog nin sadiring eskwelahan tanganing makapagheras nin inspirasyon sa mas kadakol na aki sa maabot na panahon.
