Pigkumpirmar kan Department of Foreign Affairs (DFA) na nag-abot na sa Pilipinas kan Lunes, Enero 6 an limitadong numero kan 300 Afghan nationals, nasa kabangan an minors.
Piglalaoman na matinir an mga ini sa satuyang nasyon nin dae malampas sa 59 na aldaw mantang pighahalat kan mga ini na maproseso an saindang Special Immigrant Visas applications sa US Embassy sa Manila antes na dagusang makalipat asin mag-istar sa Amerika.
Ini an sa bisa kan temporary arrangement sa pag-ultanan kan Estados Unidos asin PH na inaprubaran ni Presidente Ferdinand Marcos Jr. kan Setyembre 25, 2024 sa ibong kan mga pagkahandal kan pirang lehislador sa potensiyal na huma sa seguridad asin legal issues sa pagtitinir kan nasambitn ng mga Afghan national sa satuyang nasyon. Alagad enot ng nilinaw na an nasambitan ng Afghan nationals an bakong refugees asin bakong huma sa seguridad kan Pilipinas.
An 300 Afghan nationals an nagtrabaho para sa Amerika sa Afghanistan na nawalat kan liwat kubkubon kan militanteng Taliban an Afghanistan kan 2021.
Sigun man ki Foreign Affairs Spokesperson Ma. Teresita Daza, pig-isyuhan kan DFA nin kaukulang PH entry visa an mga Afghan national katakod naman sa mga nag-iiral na panundunan asin mga regulasyon.
Nagsairarom man an mga ini sa full medical screening antes nag-abot sa nasyon. Paramientras na matinir an mga ini sa sarong dae pinangaranang pasilidad na pinondohan kan US government asin kargo man kaini an gabos nin kinakaipohang mga serbisyo kan mga Afghan kabali an saindang pagkakan, harong, medical care, seguridad asin transportasyon hasta sa makumpleto an pagproseso sa saindang US visa.
Nilinaw man kan DFA official na dae ilalaog an mga Afghans sa anuman na EDCA sites sa nasyon. An staff na kinontrata kan US government an matao nin seguridad sa mga ini sa nasambitan ng premises, kun saen gabos kan mga ini an nasa irarom kan direct supervision kan Philippine National Police (PNP).
