Gadan an anom na katawo sa nagbungkas na kasulo sa sarong resort construction site sa Busan City, South Korea kan Pebrero 14.
Basado sa report na iniluwas kan Busan Gijang District Fire Department, nagpuon an kasulo bandang alas-10:20 nin pagkaaga, oras sa Korea asin pig-abot nin pitang oras antes dagusang naapula kan mga bumbero.
Nag-abot man sa 100 obrero an pwersahang pig-ebakwar gikan sa lugar kan kasulo mantang nasa 14 katawo an kaipohang i-rescue gamit an helicopter nin huli ta na-corner an mga ini sa taas kan edificio na nasulo.
Makalihis bahagyang mapahupa an kalayo, piglaog kan mga bumbero asin rescuers an building asin nadukayan an anom na katawong mayong malay.
Dinara pa an mga ini sa ospital alagad dagusan man sindang pigdeklarar na gadan.
Apwera sa anom na nagadan, 25 katawo an naireport na nalugadan.
Mientrastanto, mantang kasagsagan kan rescue asin firefighting operation sa nasambitan ng kasulo, ipinag-sugo man ni SoKor acting president Choi Sang-mok an pagdeploy sa gabos nin mga bakanteng personnel asin kagamitan tanganing mapugolan an paglala kan kasulo asin dagusan ining maapula.
Padagos pa man an imbestigasyon kan fire department sa pinaggikanan kan kasulo kaini na an pagbabantay sa kabilogan kan edificio.
