NAGA CITY- Nagtitinir pa nanggad na stranded an haros 7,800 na mga pasahero hale sa manlaen laeng mga daungan sa rehiyong Bicol dara kan namamateang raot nin panahon huli sa bagyong Urduja.
Basado sa pinakahuring datos hale sa monitoring kan Police Regional Office (PRO) 5, igwa pa nanggad nin 7,765 na mga pasahero, 1,036 na mga rolling cargoes an stranded sa mga daungan sa kabikolan.
Pinakadakol pa nanggad suboot an nairehistrong stranded sa Matnog Port sa Sorsogon na nag-abot sa 3,600 na mga indibidwal asin 457 na mga rolling cargoes mantang igwa man nin 105 persona an stranded sa Pasacao Port sa Camarines Sur.
Nagtitinir pa man sa mga evacuation centers an 43 na mga pamilya o 183 na mga indibidwal hale sa Camarines Norte.
Igwa man suboot nin 1,554 na mga indibidwal o 408 na mga pamilya an nag-ebakwar hale sa mga banwaan nin Bula, Minalabac, Garchitorena, Caramoan, Sipocot, Canaman asin Pasacao sa Camarines Sur.
Sa ngonyan, padagos pa an pigkokondusir na mahigot na monitoring kan mga otoridad katakod kan pag-uuran na namamatean sa manlaen laeng parte kan rehiyong Bicol huli sa nasambitang raot nin panahon.
