NAGA CITY – Maogmang pigbareta kan pamayuhan kan Naga City Police Office na mayo nin nagpositibo sa mga personahes kan saindang opisina sa pigkondusir na drug test.
Sa nagin paghampang sa mga kagawad kan media ni PCol. Erwin Rebellon, City Director kan Naga City Police Office, sinaysay kaini na an mga kabali sa mga pig drug test an gikan sa City Drug Enforcement Unit asin iba pa na nagbilog sa 80 na mga personahes.
Isusunod man ninda an mga stations dawa an mga administrative officers, alagad magigin unannounced soboot kun nuarin ini isasagibo.
Katakod kan nagpapadagos na paglaban kan mga kapulisan sa iligal na droga mas pinahigot pa ninda an saindang presensya sa Sagrada Familia, ini tanganing malikayan an padagos na paglakop kan mga nagpapabakal asin naggagamit nin iligal na droga.
Huli sa paghihigot kan mga otoridad an ibang mga drug posuer an nagbalyo na nin lugar huli ta dae na sinda makaluwas laog sa Sagrada Familia.
Apwera pa digdi mahigot man na pigpapautob an curfew hours sa lugar tanganing malikayan an pagkakaimbwelto kan mga kajovenan sa mga iligal na aktibidad.
