NAGA CITY- Nakahanda na maging testigo an naarestar na tolong mga suspek laban sa negosyante na nagsusuplay suboot nin pekeng sabon sa Pili, Camarines Sur.
Sigon sa saro sa mga suspek, nakaandam sindang maging testigo tanganing madakop na an negosyante na nagsu-suplay mismo kan mga pekeng sabon sa nasambitang banwaan.
Magiging ebidensya man suboot an anom na box kan sabon na nakumpiskar kan mga kapulisan laban sa dae pa pigpapangaranang negosyante.
Mahigot man na pinahimutikan kan mga suspek na naggigibo sinda nin pekeng mga sabon makalihis an pigkondusir na raid kan mga kapulisan.
Sigon sa saro sa mga suspek, kinua sana sinda komo mga bagong ahente kan sarong negosyante na nagsu-suplay kan sabon na ‘safeguard’.
Dae man suboot ninda aram na peke an nasambitang sabon na saindang pigpapabakal.
Mientrastanto, sigon man ki Mark Orbon, sales supervisor, iba an kolor kan packaging kan pigpapabakal na sabon kan mga suspek.
Kun ikukumparar man suboot sa orihinal na sabon, mas sadit asin bakong gayong maputi an nasambitang mga produkto.
