Uminabot na sa 9,000 kumpirmadong kaso asin 4,300 an nagadan sa Ebola outbreak sa Democratic Republic of Congo segun sa estadistikang ipinaluwas kan gobyerno kan Congo kan nakaaging Martes, Oktubre 13.
Sa tahaw kan paglaban kan saindang lokal na awtoridad sa pagkontrol sa naglalakop na virus, nairehistro kan Health Ministry kan Congo an 9,066 na kaso nin Ebola asin 4,381 katawo an nagadan sa nasabing helang.
An presenteng outbreak huli sa rare Bundibugyo variant naglakop na man sa iba pang mga komunidad na nagkawsa nin pagdakol kan hot spots kun saen 65 health zones hale sa pitong probinsya kan Congo an apektado.
Segun pa sa awtoridad kan Congo, igwa pang mga kaso na dae pa nakabale sa ipinaluwas na estadistika kan saindang gobyerno huli sa mga undetected cases.
Nalampasan na man kan presenteng outbreak an naenot na 16 outbreaks nin Ebola sa Congo kun saen bilog na nairehistro an pagkagadan nin 11,000 huli sa helang.
Mientrastanto, mayu pang kaakibat na bulong o vaccine para sa nasabing variant nin Ebola. Padagos man an pag-adal kan mga eksperto para makagibo nin bakuna kontra-Bundibugyo.
