NAGA CITY- Gadan an sarong bagong pangaking umboy makalihis na ilaog sa sako kan saiyang sadiring ina sa banwaan nin Libmanan, Camarines Sur.
Sa entrevista kan Bombo Radyo Naga ki PO2 Emy Rose Organis, tagapagtaram kan PNP Libmanan, sinaysay kaini na pinatos sa tamong, nilaog sa sako asin tinago pa kan bagong pangaking suspek na si Marivic Abainza, 36-anyos an umboy sa laog kan saindang harong sa barangay Handong.
Sigon ki Organis, nahiling kan mga aki ni Abainza an ginibo kaini kaya man tulod nindang inapod an saindang lolo na si Leon.
Tulos man na nadukayan ni Leon an saiyang bagong pangaking makuapo asin pigdalagan sa ospital alagad pigdeklarar na ining dead on arrival kan mga doktor.
Isinairarom man sa manlaen laeng mga medical test an suspek para maaraman kun igwa ini nin helang sa saiyang pag-iisip.
Sa ngonyan, nagtitinir na sa kostudiya kan PNP Libmanan an nasambitang suspek mantang inaandam na an maninigong kaso na isasangat laban sa saiya.
