NAGA CITY- Sunod-sunod na aksidente sa tinampo an nairehistro kan mga kapulisan sa laog nin sarong aldaw sa banwaan nin Pili, Camarines Sur.
Enot na nagkaigwa nin aksidente alas-3:50 nin mag-uumagahon sa barangay Palestina kun saen nakabangga sa likudan na parte kan sarong school service van na minamaneho ni William Cada, 46-anyos an SUV na minamaneho ni Benjamin Andro Asence, 32-anyos.
Ala-1:30 nin hapon man kan mabangga kan motorsiklo na minamaneho ni Nelson Nagales, 55-anyos an taxi na minamaneho ni Catalino Adan Jr., 55-anyos mantang binabagtas kaini an tinampo sa barangay San Jose.
Mientrastanto, alas-5:30 nin hapon kan mangyari an saro pang aksidente sa tinampo sa barangay San Jose sa hampang kan Central Bicol State University of Agriculture (CBSUA).
Pasiko na kuta an SUV na minamaneho kan paratukdo na si Rey Sanchez, 39-anyos kan mabangga ini kan pampasaherong jeep na minamaneho kan dae pa nabibistong suspetsado.
Padagos pang hinahanap kan mga kapulisan an nakadulag na driver kan jeep.
Pig-aaram pa man kan mga otoridad kun pira an kabilugang danyos na pigwalat kan tolong mga aksidente na nairehistro sa banwaan nin Pili.
