NAGA CITY- Lugadan an sarong soltero makalihis na saksakon sa Barangay Canayunan, Tinambac, Camarines Sur.
Binisto an biktimang si Sony Boy Dulce, na residente kan Pili. Nagluwas sa inisyal na imbestigasyon kan Tinambac-PNP na sinaksak si Dulce kan suspek na nabistong si Protacio Villa Jr. sa dae pa maaraman na rason.
Sa ngonian, padagos na pigbubulong sa Bicol Medical Center an biktima mantang padagos man an imbestigasyon kan pulisya tangani na madakop an nagdulag na suspetsado.
NAGA CITY- Irido an duwang persona makalihis na maaksidente an piglulunadan na motorsiklo sa kalabaan kan tinampo sa Barangay Dolorosa, Nabua, Camarines Sur.
Binisto an mga biktimang sinda Henry Gurobao, 42-anyos, driver kan motorsiklo asin backrider na si Macario Balatong, 54-anyos.
Nagluwas sa ginibong imbestigasyon kan Nabua-PNP na nawaraan nin kontrol si Gurobao sa saiyang pigmamanehong motorsiklo kan porbaran kaining likayan an sarong hayop na nagbabalyo sa tinampo.
Nagsapo nin lugad sa saindang lawas an nasambitan na mga persona na padagos ngonian na pigbubulong sa ospital.
