NAGA CITY- Arestado sa operasyon kan mga otoridad an duwang pigtutubudang miyembros kan notorious na Concepcion Gun for Hire Group mantang nakadulag man an saro pa makalihis suboot mangikil sa banwaan nin Balatan sa Camarines Sur.
Sa entrevista Bombo Radyo Naga ki PO2 Michael Broso hale sa Balatan-PNP, kinumpirmar kaini an pagkakadakop sa mga suspek na sinda Romeo Casili, 43-anyos asin Janero Pasadilla, 22-anyos mantang nakadulag man an area commander kan Concepcion Gun for Hire Group na si Manny Concepcion.
Sigon ki Broso, ipigkondusir kan Balatan-PNP an entrapment operation laban sa mga suspek makalihis suboot na makaabot sa saindang hepatura an reklamo kan negosyanteng si Leonilo Bermas na nakaresibe siya nin surat hale sa grupo na naghahagad nin calibre 45 na badil o kwarta na pambakal kan nasambitang armas.
Pigtuga ninda Casili asin Pasadilla na si Concepcion an nagseserbe nindang lookout antes sinda madakop kan mga otoridad.
Napag-araman na dae suboot ini an enot na pagkakataon na nagpurbar na mangikil an grupo sa nasambitang banwaan.
Marurumduman na padagos pang nilalapag ngonyan an lider kan grupo na si Gilbert na imbwelto sa high profile crimes asin an pigtutukdong nasa likod kan panggagadan sa nagkapirang prominenteng personalidad sa Bicol.
