NAGA CITY- Padagos pa nanggad an ginigibong monitoring kan Philippine Embassy sa mga Pinoy na nagtitinir sa Mexico makalihis an nagtamang magnitude 7.2 na linog sa lugar kan nakaaging Pebrero 16, local time.
Sa mensaheng ipinadara sa Bombo Radyo Naga ni Mikhal de Dios, vice consul kan Philippine Embassy in Mexico, padagos pa nanggad suboot an saindang ginigibong monitoring sa gabos na amga miyembro kan Filipino Community sa lugar para maaraman an saindang kamugtakan.
Sa tabang man suboot kan saindang advance warning, nagkaigwa pa nin 15 hasta sa 20 segundo an mga tao sa Mexico para makaebakwar antes na nagtama an makusog na linog.
Naghaloy man suboot nin 30 segundo hasta sa sarong minuto an pagyugo yugo asin nairehistro man an sunod sunod na aftershocks sa lugar.
Mientrastanto, nagkapirang edificio man an napabaretang nadanyaran urog na sa parte kan Mexico City asin Oaxaca State.
Marurumduman na nagtama an 7.2 magnitude na linog sa Mexico partikularmente na sa Oaxaca State pasado alas-5:30 nin pagkahapon kan Pebrero 16, local time.
Nadukayan an epicenter kaini sa rayong 600 km sa Mexico City.
