NAGA CITY- Pigsairarom na sa inquest proceedings sa provincial prosecutors office an ABC President asin an Barangay Captain-elect sa banwaan nin Bombon, Camarines Sur na inarestar suodma sa pigkondusir na entrapment operation kan Criminal Investigation and Detection Group (CIDG).
Sa impormasyong ipinaabot ni PC/Insp. Ronnie Fabia, head kan CIDG-Camarines Sur, sinaysay kaini na nagsairarom na subagong aga sa inquest proceedings an mga suspek na sinda Barangay Captain-elect Allan Vidalio kan barangay Pagao asin si ABC President Augusto Laure kan Barangay San Roque.
Nahahampang an duwang opisyal sa suruon-suon na kasong pagbalgar sa RA 3019 o an anti-graft and corrupt practices act asin article 212 o corruption of public officials sa irarom kan Revised Penal Code.
Marurumdumang ala-1:30 suodma kan madakop sa entrapment operation an duwang punong barangay na pigkondusir sa Peachelitos Resort sa barangay Sta. Lucia sa banwaan nin Magarao makalihis na ireklamo an mga ini ninda kapitan Rudy Clariño asin kapitan Florentino Cibuc na pigsusuhulan suboot sinda nin P100,000 para iboto sana si Vidalio komo presidente sa ikokondusir na Association of Barangay Councils (ABC) election sa nasambtang banwaan sa maabot na Hulyo.
