NAGA CITY- Pigtawan duon kan sarong Municipal Councilor sa banwaan nin Calabanga, Camarines Sur na padagos an saindang pagmanehar sa problema na pigpapa-abot sa saindang opisina orog na an mapadapit sa mga parahabal-habal asin kolorum na behikulo.
Sa entrevista kan Bombo Radyo Naga ki Roque Orlin, Municipal Councilor kan Calabanga, Camarines Sur, sinaysay kaini na nagtitinir na problema ngunyan kan transport group sa saindang banwaan an mga parahabal-habal asin colorum na behikulo orog na ta nagigin ka-kompetensiya soboot ini kan mga lehitimong nagpapasada.
Katakod digde, mahigot man na pigbabawalan kan saindang lado an pagkayod kan mga parahabal-habal asin colorum na behikulo alagad problema man kan mga ini an paghahanay-buhay.
Huli digde,, pigpaplanuhan na tawan nin marhay na lugar an mga nasambit na sektor alagad ini an maagi pa sa pag-urulay asin pagtugot kan mga rehistrado asin lehitimong Tricycle Operators and Drivers’ Association.
Sa ngunyan, hagad kan opisyal na dae pagpuonan nin kariribukan an problema nin huli ta padagos man an saindang ginigibong lakdang tanganing masimbagan ini.
