Pinag-aadalan kan Department of Agriculture (DA) an pagpapatindog nin dakulang solar-powered ice plants tanganing masimbagan an labi na pagkaraot kan mga agricultural products.
Sa irarom kan inisyal na plano, sinaysay ni DA Sec. Francisco Laurel Jr. na pwedeng maglaan an Philippine Fisheries Development Authority asin Bureau of Fisheries and Aquatic Resources nin sadiri nindang pondo para sa mga planta.
Sigun sa sekretaryo, halangkaw an ‘spoilage’ kan mga high value crops sa nasyon asin nag-aabot pa sa 35% hasta 40%.
Sa paagi kan mga darakulang planta kan yelo, pwede soboot masuplayan an mga farm puon sa storage hasta sa merkado kun nuarin na ipapabakal an mga ini.
Sa fisheries sector, pwede soboot gamiton an darakulang bulto kan yelo sa mga cold storage para sa mga parasirang nagsasagibo nin deep-sea fishing.
Sa paagi kaini soboot, pwedeng mag-abot pa sa pitong aldaw o sarong semana an pagigin sariwa kan mga sira.
Sigun pa sa sekretaryo, posibleng itugdok man an mga planta harani sa mga komunidad na pigbibilog kan mga kadakol na mga paraoma asin parasira tanganing mairani sa sainda an serbisyo kan mga ini.
Pigsierto man kaining malangkaw an kita kan mga ini kun igwa sindang bastante asin akmang storage facilities tanganing ma-preserba an saindang mga produkto asin madara an mga ini sa mga outket na igwang mas halangkaw na presyuhan.
Pighalimbawa kan sekretaryo an kalimitang piggibo kan mga paraoma sa local selling o sa saindang mga lokalikad mismo pigpapabakal an saindang mga produkto tanganing malikayan an pagkaraot.
Sa paagi kan akmang storage, pwede pa soboot darahon an mga ini saen man ninda mawoton.
