Labi 1,700 na bombero an nagtarabangan sa pinakadakulang kasulo sa kagubatan kan Japan.
Sigun sa mga opisyal pigkakarkulong 4,600 na residentes an nagtitinir sa irarom kan mga advisory para sa tulos na pagpapa-ebakwar mantang padagos pigtutumtom kan gobyerno an kalayo.
An kasulo na nagsiklab sa hilagang parte kan Iwate Region kan Japan an nagkitil nin sarong buhay puon kan magpuon ini kan nakalihis na semana.
Mientrastanto, pigkakarkulong mapakol man sa 2, 100 na ektarya an nagtupok sa Ofunato, puon kan nakalihis na Huwebes, sigun sa datos kan Fire and Disaster Management Agency.
Komo kasimbagan, nagsanib pwersa an mga bombero gikan sa 14 rehiyon, kaibahan an Tokyo, asin 16 na helicopter, kaibahan na an mga unit kan militar, tanganing resolbaran an kasulo.
Hasta kaining weekend, 84 na mga establisyemento na an naraot kan kasulo, alagad padagos pa man an pag-aadal sa kamugtakan kan mga naraot na ari-arian.
Basado sa record kan ahensiya pigkakarkulong 2,000 na katawo na an nag-ebakwar sa lugar na pinili man mag-istar sa saindang amigo asin kaparientes mantang 1,200 na katawo an nagtitinir sa mga evacuation center.
Alagad maski nagbaba an numero kan mga wildfires sa Japan puon kan nakalihis na dekada 1970, igwa man poco mas o menos 1,300 na kasulo an naikurit kan nasyon kan nakalihis na taong-2023.
Kadalasan, an mga kasulo na ini an nangyayari puon Pebrero hasta Abril, dara kan dry air asin makusog na duros.
Katakod kaini, saro pa sa mga pighihiling na rason kun tano naglala an kasulo sa Ofunato an huli soboot sa matinding pagbababkan pag-uran kan nakalihis na bulan kan Pebrero, kun saen 2.5 millimeters (0.1 pulgada) sana an naikurit na uran sa lugar, kumparar sa karaniwang 41 millimter sa bulan na ito.
Kun saen ini an bagong record na pinakahalawig na panahon kan dae pag-uran sa lugar, puon kan nakalihis na taong-1967.
