Pigpagirumdom kan Department of Energy (DOE) an publiko na magtipid sa pagkonsumo nin kuryente ngunyan na pagpuon kan panahon nin tag-init sa nasyon.
Sa sarong statement, pig suhesyton kan ahensiya an publiko na likayan o i-reschedule an mga aktibidad na makonsumo sa kuryente kada peak hours, magpuon alas-11 nin aga hasta alas-3 nin pagka hapon sa weekdays asin man alas-6 nin pagkabanggi hasta alas-9 sa weekends sa Luzon area asin man magpuon alas-11 nin aga hasta alas-3 nin hapon asin alas-6 nin banggi hasta alas-9 man sa Visayas asin Mindanao.
Sa mga oras na ini kaya, pinakadakol na naggagamit kan kuryente sigun sa DOE kaya man an pag-shift kan mga gibuhon na makonsumo sa kuryente an makakatabang na malikayan na mapuwersa an grid asin magin an power shutdown.
Sigun pa ki Energy Secretary Rapahel Lotilla, enkaso summer months na, mas halangkaw an demand sa kuryente, na karaniwang kawsa kan madalas na paggamit nin cooling appliances siring kan air conditioners, electric fans asin refrigerators, na pwedeng makapag-strain sa power grid na posibleng humantong sa problema sa suplay asin pagbaba-taas nin presyo sa spot market.
Basado sa demand forecast ngunyan na taon, pigkarkulo kan DOE na mag-peak an demand sa 14,769 megawatt (MW) sa Luzon, 3,111 MW para sa Visayas, asin 2,789 MW para sa Mindanao. Mientrastanto, piglalaoman man kan DOE na mapapahupa nin piglalaomang La Niña asin mga pag-uran an mainit na panahon sa nasyon.
