Nagbisita si Presidente Ferdinand R. Marcos Jr. sa Singapore Nuclear Research and Safety Institute (SNRSI) kan nakaaging Sabado tanganing maaraman an kakayahan kan Singapore sa nuclear technology, kasabay kan pagtulod kan Pilipinas sa paggamit nin nuclear energy bilang alternatibong gikanan nin kuryente.
Segun sa Presidente, an katuyuhan kan pag-adal iyo na mapakusog an suplay nin kuryente asin makatabang sa pagpababa kan singil na binabayadan kan mga Filipino, sa tahaw kan padagos na paglangkaw kan presyo nin kuryente asin pagbabago nin klima.
Durante kan pagbisita, tinawan si Presidente Marcos nin briefing ni SNRSI CEO Low Xin Wei manungod sa pagsaligsig kan institusyon sa nuclear technology asin kaligtasan.
Sinabi man kan Presidente na mas bukas na ngunyan an dakul na Filipino sa paggamit nin nuclear energy, partikularmente sa usap nin kaligtasan. Dugang pa niya, igwa man nin mga propesyonal an nasyon na pwedeng gamiton sa pagpauswag kan sektor, kasunod kan mga naenot na eksperyensya kan Filipinas sa nuclear power.
Segun ki Presidente Marcos, nasa inot na duwang yugto na an Filipinas kan pagpreparar para sa posibleng paggamit nin nuclear energy.
