Aram baya nindo mga ka-bombo, sarong textile worker sa estado kan Brazil an pig-akusaran na binugtakan nin lason an water bottle kan saiyang ka-trabaho makalihis na magkaigwa nin mainit na diskusyon an duwa huli sa soboot dae patas na promosyon.
An nasambitan ng insidente an nangyari kan nakalihis na bulan sa sarong textile factory sa Abadia de Goias, sarong banwaan sa Goiânia Metropolitan Region.
Sigun sa mga otoridad, an 38-anyos na suspek an nahiling sa CCTV cameras na igwang piglalaag sa inumon na tubig kan saiyang katrabaho.
Makalihis ini, nakamate soboot nin pagkapaso sa saiyang lalamunan an katrabaho kan suspek.
Katakod kaini, sa pigsagibong pag-analisar sa water bottle, napag-araman na igwang halangkaw na konsentrasyon kan potent solvent sa tubig na boot sabihon intensyon na lasunon an siisay man na mainom kaini.
Basado man sa salaysay kan mga witness an suspek asin biktima an dating mag-amiga alagad nagkaigwa nin problema kan makareseber nin promosyon an biktima na para sa suspek an dae patas.
Puon soboot kaidto pirme nang nagkakaigwa nin diskusyon an duwa asin antes pa an mismong insidente nagkaigwa nin iwal an mga ini.
Tolos man na pig-aresto kan mga kapulisan an babae makalihis na mahiling sa CCTV camera an saiyang ginibo.
Mahahampang man an suspek sa kasong attempted aggravated homicide, na kun saen igwang sentensiya na nag-aabot sa anom hasta 20 taon na pagkakakarsel.
