Dae na mahulogan nin dagom an mga nagpasiring sa isinagibong rally kasuodma, Domingo, Marso 16, sa Davao City tanganing ipahiling an suporta ki dating Presidente Rodrigo Dutete, mantang ini nakakulong sa International Criminal Court (ICC) sa The Hague, Netherlands.
Labi 30,000 na mga taga-suporta kan dating Presidente an nagtiripon para sa sarong solidarity walk komo pag-tutol sa saiyang kasuarin sanang pagkaka-arestar katakod sa soboot mga kasong crimes against humanity sa saiyang madugong ‘war on drugs’.
Nagpuon mag-martsa an mga taga-suporta ni Duterte sa CM Recto street asin nagtapos sa San Pedro Square na pigsunodan man nin prayer rally.
Mantang sulot kan mga ini an itom na t-shirt komo pagpapahilibg na sinda an nagdadalamhati. Bitbit man kan mga nagpartisipar sa rally an mga banner na igwang mensaheng ‘I STAND WITH FPRRD’ at ‘BRING FPRRD BACK HOME’.
Marurumdoman kan nakalihis na Sabado, pinangenotan ni Vice President Sara Duterte an mga paghihingowa tanganing ipagtanggol an saiyang ama na nagdara man nin mga diskusyon dapit sa mga kasimbagan kan dating Presidente.
Kan nakalihis na semana, sinaysay kan pambansang kapulisan na nakabantay an saindang hepatura dapit sa mga aktibidad na piggigibo kan mga taga-suporta ni FPRRD asin sinaysay na nagin marhay an rally asin mayong naikurit na major untoward incidents.
Kasuodma, marurumdoman na nagpuon an rally sa sarong motorcade sa manlaen-laen na lugar sa Metro Manila, asin pigsunodan ini nin vigil asin interfaith prayer.
Mientrastanto, enot nang nahiling si FPRRD sa ICC kan nakalihis na Biyernes via video link gikan sa sarong detention center kun saen sa ginanap na hearing, pigkompirmar kan Pre-Trial Chamber an saiyang pagkakakilanlan asin pigsierto na lubos na naiintindihan an mga kasong konektado kontra sa saiya asin an saiyang mga derechos sa irarom kan Rome Statue kan ICC.
Mantang ipigtalaan man kan chamber an masunod na hearing para sa confirmation kan mga kaso ni Duterye sa Setyembre 23, 2025.
