Aram baya nindo mga ka-bombo, sarong indibidwal na naggradwar sa University of British Columbia an nagpadara nin package sa eskwelahan na an laog iyo man an libro na saiyang pigsubli sa library 64 taon na an nakakalihis.
Sigun ki Susan Parker, librarian sa nasambitan ng Unibersidad, an package na ini an nag-abot kan nakalihis pa na January na kun saen kan saiyang bukasan digde nadiskubrer an 1931 edisyon kan Horace Kephart’s book Camping and Woodcraft na igwang pamagat na Handbook for Vacation Campers and for Travelers in the Wilderness.
An nasambitan ng libro an pigsubli sa library kan taong 1960 kan estudyante na si Robert Murray.
Katakod digde, an libro an igwang kaibahan na surat gikan ki Murray na sa presente nag-eedad 83-anyos kaibahan an sarong cheque na nagkakantedad nin $70.
Apwera digde, kaibahan man sa package ni Murray an sarong newspaper clipping kan taong 2013 dapit sa 1965 edition kan kaparehas na libro na pigbalik sa Prince George Public Library makalihis an 30 taon.
Mientrastanto, pigsierto man ni Parker na maski haros anom na dekada nang dae naibalik sa library an libro nasa marhay pa man sonoot ining kondisyon nin huli ta inataman nin marhay ni Murray.
Sa ngunyan, maski haloy nang pighali sa library system an libro alagad an kwarta na pigtao ni Murray tanganing pambayad sa late fees an gagamiton sa iba pang pangangaipuhan kan pasilidad.
