NAGA CITY- Mayo pa man mayor na problema na narereseber an City Agriculture Office sa siyudad nin Naga sa lado kan mga paraoma orog na ngunyan na padikit-dikit nang namamatean an labing init kan panahon.
Sa entrevista kan Bombo Radyo Naga ki Engr. Ernest Asence III, City Agriculture Officer, sinaysay kaini na sa presente, papaabuton na an harvest season para sa mga paroy sa bulan kan Abril mantang sa lado man kan mais mga bagong tanom ini asin nasa ikaduwang bulan.
Sigun pa ki Asence, maski namamatean na an halangkaw na lebel kan heat index, mayo pa man issues pag-abot sa suplay kan tubig na gikan sa mga irigasyon.
Alagad, pig-ako kan opisyal na igwang mga lugar an dae aabuton kaini sa mga masunod na bulan.
Huli digde, liwat na pig-abisuhan an mga paratanom na paramientras na ipauktaba an pagtatanom nin paroy asin pilion muna an pagtanom kan mga gulay o high value crops na mas magigin madali an paghahanap nin suplay kan tubig.
Katakod kaini, padagos man an pangapudan ni Asence sa mga local farmers na dae malingaw magpa-insure kan saindang mga omahan tanganing igwang makua na tabang sa panahon kan pangangaipuhan gikan sa PCIC.
Apwera digde, matao man an DA nin tabang siring kan libreng banhi, fetilizer discount voucher asin an fuel subsidy orog na para sa mga rehistrado sa The Registry System for the Basic Sectors in Agriculture (RSBSA).
Sa ngunyan, pigsierto na sana kan opisyal na padagos an saindang pagtutok sa lado kan mga paraoma tanganing tolos na masimbagan enkaso igwang magbungkaras na problema.
