Nagkawsa nin bahagyang danyos asin pag ebakwar kan mga residente huli sa nagtamang magnitude 7.0 na linog harani sa Tonga ngunyan na aldaw nin Lunes, Marso 31.
Basado sa live video kan local media sa Tonga, umalingawngaw an tsunami sirens makalihis magtama an linog pasado ala ala-1:18 nin mag oomagahon tangani iibakwar an mga residente sa salbado na lugar.
An mga residente sa kabisera kan Nuku’alofa ay nag ebakwar man pasiring sa inland o mas halangkaw na ground.
Pigheras kan Tongan Taekwondo athlete na si Pita Taufatofua sa saiyang facebook account an nangyaring linog kun saen idinetalye kaining nagsibagsakan an nagkapira sa mga gamit gikan sa mga istante asin lamesa siringman an mga ladawang nakakabit sa dingding ay nagsihulugan asin nadipisilan soboot ining makatindog asin man ngunyan sana ninda naeeksperyensyahan an siring na kahaloy na pagyugo-yugo.
Basado sa US Geological Survey, an episentro kan linog ay 100 kilometers gikan sa hilagang-silangan kan main island, may rarom ini na 29 kilometers.
Pirang oras an nakalihis, sinundan ini kan magnitude 6.1 na linog na naghaloy man nin segundo na nag tama sa parehong lugar.
Nag-isyu man an Pacific Tsunami Warning Center nin notice makalihis an linog huli sa posibilidad nin peligruso na mga hukol alagad pighali man an warning makalihis an pirang oras.
Sa inisyal na report, mayong nairehistro na casualties alagad nagpapadagos pa an pigsasagibong damage assessment.
