Dae mababa sa 11 katawo, kabali na an tolong aki an binawian nin buhay makalihis na magrasay an sarong edificio sa hilagang-sirangang parte kan New Delhi kan Sabado, sigun sa mga report kan lokal na media asin otoridad.
Nangyari an insidente sa sarong distrito na pangenot na pig-iistaran kan mga namamanwaan duman. 11 katawo an pigdeklarar na nagadan mantang 11 pa an naisalbar asin pigdara sa ospital. Lima sa mga ini an padagos na pigbubulong.
Nagpaabot naman nin pakikidumamay si Indian Prime Minister Narendra Modi sa mga nawalat na pamilya.
Nagpaluwas na man nin pahayag si President Droupadi Murmu asin sinabing labi ining namumundo huli sa pagkagadan kan kadakol na tawo, kabali na an mga kababayehan asin mga aki. Mayo pang opisyal na report sa kawsa kan pagrasay, alagad pigtutukdo ni Delhi minister Kapil Mishra an soboot katiwalian sa lokal na gobierno, na pinamamayohan kan kalabang partido, komo rason sa pagdakol kan mga ilegal na edificio.
Sigun pa sa mga report, an apat-na-palapag na edificio an nagbagsak na garo na karaniwang nangyayari sa India nin huli sa kadakol nin ilegal asin maluluyang estrukturang pig-iistaran kan mga residente sa madarkulang siyudad.
Padagos an imbestigasyon mantang nagpapadagos an rescue operations sa lugar kan trahedya.
