Pigbuyagyag kan Bureau of Immigration (BI) an pag-aresto sa duwang South Korean nationals na parehas wanted kan Interpol asin kan mga otoridad sa Seoul nin huli sa pagkakadawit kaini sa multi-million dollar investment scams.
Sa sarong entrevista, binisto ni Immigration Commissioner Joel Anthony Viado an saro sa mga pugante na si Kim Young Sam, 50 anyos, na dinakop kan mga operatiba kan Fugitive Search Unit kan BI kan Abril 22 sa laog kan saiyang pig-eerokan sa BF Homes Village, sa Syudad kan Parañaque.
Sigun ki Viado, mantang isinasagibo an operasyon, natunton man kan mga otoridad an presensya kan saro pa na Koreanong pugante na binistong si Weon Cheolyong, 59 anyos.
Sinaysay kan BI chief na tulos nang ipadedeport si Kim nin huli kan Disyembre 2021 pa siya pinaluwas kan kasuguan kan BI Board of Comissioners na pahalion sa nasyon komo sarong “undesirable alien.
Subject man kan Interpol red notice si Kim na pinaluwas kan 2018 antes siya isyuhan kan warrant of arrest kan Seoul Central District Court nin huli ta sa pangingitil kaini kan pondo para sa sarong negosyo nin mayong government permit.
Magigirumduman, poon pa kan 2015 an labi 3 bilyong piso an naipon hali sa 253 biktima kan nasambit na kumpanya.
Mientrastanto, nagluwas sa enot na imbestigasyon na si Weon na sarong overstaying alien asin wanted man sa Korea nin huli ta sa sarong investment fraud na nagtaong pagkalugi kan labi 17 milyong piso gikan sa 14 na biktima.
Matinir man sa custodial facility kan BI sa Camp Bagong Diwa, syudad kan Taguig an duwang dayu antes hinahalat an saindang deportasyon.
