Pinasalamatan ni Commission on Elections Chairman George Erwin Garcia kan nakalihis na aldaw nin Biyernes, Mayo 2, an Department of Agriculture sa desisyon kaining paramientras ipauntok an bentahan kan P20 kada kilong bagas sa laog kan 10 aldaw, o kasabay kan ayuda ban.
Inanunsyar kan DA kan Huwebes na paramientras kaining ipapauntok an bentahan kan P20 kada kilong bagas hasta sa Mayo 12 komo kasimbagan sa direktiba kan Comelec.
Antes kaini, inanunsyar kan Comelec na ipagbabawal an distribusyon kan ayuda magpuon Mayo 2 hasta Mayo 12, o sampulong aldaw antes man an halalan.
An ayuda an tumutukoy sa ano man na klase nin cash assistance na pigheheras kan gobyerno. Sakop kaini an Assistance to Individuals in Crisis Situations (AICS), TUPAD, 4Ps, asin man kontrobersyal na Ayuda para sa Kapos ang Kita Program (AKAP).
Sa ibong kaini, exempted man sa ban an medical asin burial assistance.
