Liwat na umapelar an United Nations sa Israel na bukasan na an mga border kan Gaza tangani makalaog an labi sa 3,000 truck nin lifesaving aid, sa tahaw kan naglalang krisis na inapod kan sarong UN official na “malupit na collective punishment.”
Susog sa mga report, rinibong Palestinian an naglaog sa sarong field office kan United Nations Relief and Works Agency (UNRWA) sa Gaza kan nakalihis na Miyerkules tangani maghanap nin bulong.
Bagaman mayo nin nakulgan, naraot man an nagkapirang mga lunadan asin nakua an mga suplay.
Magpuon kan magtapos an untok-putukan kan nakalihis na Marso 18, pinutol kan Israel an gabos nin ayuda palaog nin Gaza. Sigun sa Israel, parte ini kan estratehiya tangani pwersahon an Hamas na palayaon an natatadang hostages asin sumuko.
Alagad sigun sa U.N. High Commissioner for Human Rights, an paggutom sa sibilyan an pogkokonsiderar na war crime.
Basado sa tala kan Gaza Health Ministry, labi sa 52,000 na an binawian nin buhay sa giyera magpuon Oktubre 7, 2023, kabali an labi sa 2,200 magpuon kan liwat na maglunsar nin opensiba an Israel kan bulan nin Marso.
An United Nations Relief and Works Agency (UNRWA) an nagsabing 660,000 mga aking Palestinian an dae na nakakalaog sa eskwelahan asin labi sa 1 milyong aki an nasa peligro kan matinding malnutrisyon.
