Nakapagrehistro an Philippine National Police (PNP) nin kabilogang 27 na kaso nin kadahasan sa election day.
Dakulang parte kaini an nairehistro sa Mindanao siring man kan mga shooting incident asin mga pagsabog.
Sa Bangsamoro Autonomous Region in Muslim Mindanao (BARRM), tulong shooting incident an nangyari na sinundan kan tutlong pagsabog. Limang katao man an binawian nin buhay huli sa mga election-related incident sa nasambitan ng rehiyon.
Nagkapirang mga shooting incident man an nairehistro sa iba pang parte kan nasyon sa mismong aldaw kan halalan.
Sa Negros Island Region, duwang katao man an nagadan huli sa mga election-related incident mantang tig-sarong katao an gadan gikan sa Zamboanga Peninsula asin Davao Region.
Sa kabilogan man kan implementasyon kan liqour ban, nag abot sa 232 katao an naarestar.
Sigun sa pulisya, nagpakol man sa 167,319 pulis an naideploy sa bilog na Pilipinas tangani siertuhon na magin maayos, matuninong, asin salbado an halalan.
Ini an katampad kan 71.19% kan kabilogang police force. Kabali digde an kabilogang 3,698 pulis na na-assign komo special electoral board members sa Bangsamoro Region magin man sa probinsya kan Abra.
