NAGA CITY – Padagos an pagmonitor kan pamayuhan kan Brgy. Concepcion Grande, sa siyudad nin Naga sa mga nagmamanok na residente huli sa huma kan Avian Flu Virus.
Sa entrevista kan Bombo Radyo Naga ki Jerrold Rito, Kapitan kan nasambitan ng barangay, sinaysay kaini na sa presente, mayo pa man sindang nairehistro na naapektaran kan nasambitan ng virus sa saindang lugar, alagad padagos pa man saindang pigsasagibong monitoring, partikulamente na sa mga residenteng nag-aataman nin mga manok.
Sigun ki Rito, pagpaabot nin emergency meeting an City Government sa pangengenot kan City Veterinary Office, kun saen, pigsugo an lambang barangay opisyal na magkundusir nin invertory na sainda namang pigsagibo kan nakalihis na semana.
Sa nasambitan ng barangay, diit sana an igwa nin poultry farm kun ikukumparar soboot sa ibang barangay.
Katakod kaini, isasagibo pa man an swapping test sa mga manok tanganing masierto asin maitama an impormasyon dapit sa siring na virus sa saindang lugar. Enkaso man soboot maapektaran sinda kaini, igwa nin itatao na insentibo an lokal na gobierno sa mga maysadiri.
Mientrastanto, piglinaw man kan City Office na mayo sindang itutudok na bakuna sa mga manok orog na ta dae pa ini available.
Sa ngunyan, pangapodan na sana kan kapitan na dae mahadit na ireport sa saindang opisina an saindang mga poultry animals siring na sana kan manok tanganing malikayan an mahewasan na paglakop kan siring na virus.
