Dae mababa sa 28 katao an nairehistro na nagadan sa pananalasa kan makukusog na bagyo asin man buhawi gikan sa gitnang bahagi kan East Coast, susog sa mga opisyal.
Pinakamalalang tinamaan an Kentucky, kun saen 19 an naireport na binawian nin buhay na kadaklan iyo an mga taga Laurel County.
Sigun ki Gov. Andy Beshear, kabali sa mga nagadan iyo an sarong beteranong bombero na si Maj. Roger Leslie Leatherman, na nagadan mantang nagtatabang sa sakuna.
Kadakol na mga kaharungan man an nawasak asin mga pamilya an napiritang magtago sa saindang basement mantang nag-aagi an makusog na buhawi.
Sa ibong na banda, sa Missouri, pito man an naireport na nagadan, lima sa syudad kan St. Louis, na tinamaan kan sarong EF-3 tornado o sarong buhawi na may makusog na duros na 140 mph.
Mientrastanto sa state man kan Virginia, duwang katao man an gadan makalihis mabagsakan nin kahoy an saindang mga lunadan. Sa kabilugan, 15 states an apektado kan bagyo, na may 26 na naireport na nag aging buhawi, asin darakulang hail. Labi sa 462,000 na mga kaharungan an naireport man na nawaran nin kuryente.
Mientrastanto, nagpatanid an mga weather authorities nin panibagong bugso kan maraot na panahon, partikularmente sa state kan Oklahoma, Texas, Northeast U.S., asin South-Central Plains.
Pinaglalaomang magdara ini nin makukusog na uran, duros, hail, asin man posibleng mga buhawi. Padagos an ginigibong imbestigasyon kan gobyerno kan Estados Unidos asin an pagsimbag kan mga federal agencies, mantang nangapudan an mga opisyal sa publiko na magtinir na alerto asin preparado sa pag abot sa sakuna.
