NAGA CITY- Pigsugo na ni Regional Director Brig. Gen. Andre Dizon kan PNP Bicol an Camarines Sur Provincial Police na magkundusir nin hot pursuit operation asin hararuman na imbestigasyon sa nangyaring pambabadil-gadan sa sarong barangay opisyal sa probinsiya.
Marurumduman, binisto an biktima na si Nerio Braza, barangay Kapitan kan Barangay San Juan, Pili, Camarines Sur na nagsapo nin tama kan badil sa manlaen-laen na parte kan saiyang lawas na nagresulta sa saiyang tolos na kagadanan.
Pigsierto ni Dizon na an mga imbestigador an aktibong pigsususog an gabos na mga impormasyon sa motibo kan krimen asin siisay an mga salarin.
Obheto soboot ninda na mabisto asin madakop an mga salarin kun kaya an footage na gikan sa Closed-circuit television (CCTV) na yaon sa area an nasa kamot naman kan mga otoridad.Gabos soboot ginigibo kan mga kapulisan para sa marekas na pagresolba kan kaso.
Basado man sa inisyal na imbestigasyon na pigkundusir kan Camarines Sur Provincial Police Office, an mga suspek an nakasulot nin bonnets asin nakalunad sa motorsiklo kan isagibo an krimen.
Nagpa-abot naman nin pakikidumamay an opisyal sa mga kaparientes kan biktima asin pigsierto na magpapadagos-dagos an saindang imbestigasyon.
