NAGA CITY- Opisyal nang pigpuonan an Brigada Eskwela 2025 sa Rehiyong Bicol kasabay kan tema na Brigada Eskwela: Sama-sama Para sa Bayang Bumabasa.
Sa nagin patara-tara ni Dr. Gilbert Sadsad, Regional Director kan DepEd-Bicol, sinaysay kaini na ngunyan na taon kasabay kan pagkundusir kan Brigada Eskwela, liwat na pig-eenkaminar an gabos na makipagtabangan, mag-volunteer para sa pig-aapod na literacy development.
Sigun ki Sadsad nakapokus an saindang departamento sa ngunyan sa pagpapagayon asin pagigin preparado kan mga estudyante sa pagbasa, pagkwenta asin pagkasabot.
Katakod digde, pigtawan duon kan opisyal na an kada saro an igwang importanteng papel na dapat gampanan tanganing mapamarhay an disposisyon kan mga learners.
Huli kaini, liwat na pig-eenkaminar an publiko na magin committed sa pakikipagtabangan bako sana sa paglilinig kundi pagheheras kan saindang oras asin mga impormasyon na dakulang ambag para sa ikakauswag kan mga estudyante.
An anuman na itinao kan sarong tawo orog na kun para sa ikakarahay kan kagabusan an mabunga man nin magayon. Babaguhon soboot kan anuman na tabang an henerasyon sa presente.
Mientrastanto, an Brigada Eskwela an madurar nagpuon kan nakalihis na Hunyo 9 asin madurar hasta Hunyo 10. Sa ngunyan, hagad na sana ni Sadsad an kooperasyon kan publiko para sa karahayan kan mga estudyante sa bilog na Rehiyong Bicol.
