NAGA CITY- Pinagirumduman kan Department of Health Bicol an publiko na mag-adaptar nin lakdang kontra dengue sa paagi kan “4S Kontra Dengue” strategy kasabay kan pagpupuon kan tag-uran.
Katakod kaini, pigreport kan DOH an kabilugang 952 dengue cases sa Bicol region puon Jan. 1 hasta May 24, 2025 na katampad kan 112-percent na paglangkaw sa mga kaso kumparar kan nakalihis na peryodo kan taong 2024.
Kabali sa “4S” strategy an Search and Destroy mosquito breeding places, Secure Self Protection gikan sa mga kagat kan namok, Seek Early Consultation kun igwang mga namamatean na sinyales kan dengue asin an panghuri an Say Yes to Fogging.
Pigsaysay kan ahensiya na padagos an saindang kolaborasyon sa saindang mga ka-partner asin local government units tanganing papusugon an implementasyon kan National Dengue Control Program.
Huli kaini, padagos an pag-enkaminar kan DOH sa publiko na maglinig kan saindang mga kaharongan asin nasasakupan na area tanganing magin salbado an saindang pamilya.
Mas marhay soboot na naglilikay kaysa magbasol sa bandang huri orog na ta an helang na dara kan lamok an peligroso sa lawas kan mga tawo.
Apwera digde, padagos man saindang pagpapagirumdum sa mga kaakian na magin mapagmangno sa kapalibutan partikular sa saindang pigdudumanan na lugar, maglaag nin mga mosquito repellant tanganing igwang pangontra.
Sa ngunyan, hagad na sana kan DOH an pakikipagtabangan kan publiko tanganing makalikay an publiko sa anuman na kahelangan.
