NAGA CITY – Pigtawan-duon kan sarong propesor sa siyudad nin Naga na dapat surion nin marhay kan publiko an saindang pigbabasa o pigdadalan sa social media.
Sa entrevista kan Bombo Radyo Naga ki Prof. Kenjie Jimenea, Dean of Student and Alumni Affairs kan University of Nueva Caceres, sinaysay kaini na an naglalakop na AI video mapadapit sa impeachment ni Vice President Sara Duterte an nagpapahiling kan reyalidad na bakong gabos na nahihiling sa social media an totoo.
Ini man soboot an nagpapatunay na maski an mga public officials an dae naman ninda aram kun ano an totoo asin kun ano an AI-generated.
Huli digdi, dapat soboot surion kan gabos na social media users an saindang mga nahihiling online.
Dugang pa kaini, maski pa igwa kan pig-aapod na freedom of expression, dapat pa man maging responsable sa pagheheras nin impormasyon.
Katakod kaini, pigsuhestyon man ni Jimenea sa mga ahensya kan gobierno, siring kan DepEd asin DICT, na higotan pa an mga programa na maedukar sa mga namamanwaan dapit sa pag-aram kan tama asin salang impormasyon.
Marurumdoman, napatubod sinda Senator Bato Dela Rosa asin Davao City Vice Mayor-elect Sebastián “Baste” Duterte sa naglalakop online na AI-generated video, kun saen sarong estudyante an nag-e-explain kun tano dae ini suportado sa impeachment ni VP Sara.
Katakod kaini, basado man sa anti-cybercrime law, posibleng masunadan nin kaso an mga tawo na nagheheras nin impormasyon na nakakaraot sa sarong indibidwal o institusyon.
