Presenteng nakadaong an duwang Japanese destroyers sa Port Area, Manila para sa tolong aldaw na port visit sa nasyon.
Nagpapahiwatig ini nin pagpapararom pa sa koordinasyon sa pag-ultanan kan naval forces kan Pilipinas asin Japan kasunod kan ratipikasyon kan Reciprocal Access Agreement (RAA).
Nag-abot sa Manila Port an JS Ise (DDH-182), na sarong Hyuga-class helicopter destroyer, asin JS Suzunami (DD-114), na saro mang Takanami-class destroyer kasuudma nin pagkaaga komo parte kan Indo-Pacific Deployment 2025 kan Japan Maritime Self-Defense Force, sarong inisyatibo na obhetong pakusugon pa an kooperasyon kaini sa mga kaalyado asin partner na hukbong dagat sa rehiyon sa paagi kan mga sanib-pwersang pagsasanay.
Pigsabat man kan mga personnel kan Philippine Navy kaiba kan Navy band an Japanese navies.
Sigun ki Rear Adm. Natsui Takashi, commander kan Japenese Maritime Self-Defense Forces Escort Flotilla Fourm, nagsisimbolo an port call sa commitment kan Japan para suportaran an PH asin iba pang like-minded nations sa pagmamantinir kan malaya asin bukas na Indo-Pacific region.
Nilinaw man ni Adm. Takashi na an deployment kan 2 Japanese destroyers an mayong punterya o target na anuman partikular na nasyon asin naglalaom na maging pagkakataon ini tanganing maibusol an bilateral defense cooperation asin exchanges tanganing makaputan an sarong libredo asin bukas na Indo-Pacific.
Ini man an ikatolong pagbisita kan Japan navies sa nasyon ngunyan na taon mantang ini man an ikaduwang beses na pagbisita para sa JS Ise na naenot ng nag-port visit sa Subic kan 2017.
Mientrastanto, nakatalaan man na magsagibo nin naval exercises an Japan forces kaiba an Philippine Navy tanganing pakusugon pa an saindang interoperability asin ipinahiwatig an pagsasagibo nin mas kadakol pang naval engagements kaiba an saindang PH counterparts sa irarom kan RAA.
Ang pagbisita man kan Japanese destroyers sa nasyon an kasunod kan panibagong panghaharass kan barko kan China Coast Guard (CCG) kun saen nagsagibo ini nin water cannon attack kontra sa mga barko kan Pilipinas sa Panatag shoal o Bajo de Masinloc kan sarong aldaw sana, June 20 mantang nagheheras nin fuel subsidies sa mga parasisirang Pilipino sa lugar.
Apwera pa digdi, pighayag man Adm. Takashi na nakamasid an saindang Hukbo sa naval activities kang China sa pinag-aagawang kadagatan kabali na sa mga katubigang nakapalaog sa exclusive economic zone (EEZ) kan Pilipinas.
