Kinumpirmar kan Philippine Navy na mayo pa man sindang nareresiber na pormal na koordinasyon gikan sa Department of Justice (DOJ) dapit sa search and retrieval kan mga lawas kan mga nawawarang sabungero na dae soboot inilubong sa Taal Lake.
Sigun ki Philippine Navy Spokesperson Capt. John Percie Alcos, bagaman mayo pang pormal na koordinasyon tangani ikasa an operasyon, pigsierto kaini na nakapreparar an saindang kabo tangani pagsirbihan an mga kahimanwang Pilipino tangani masiguro na mamantinir an kasalbaduhan kan publiko.
Katakod man na sa kahagadan kan DOJ sa saindang special naval operations command, pigsierto man ni Alcos na kun igwa nang koordinasyon an departamento sa saindang kabohan, tulos sindang matalaga nin mga tauhan tangani ikasa an misyon.
Katakod man digde, bagaman dipisil kun hihilingon an gigibuhong search and retrieval sa mga bangkay alagad, siniguro ni Alcos na nakapreparar an saindang special naval operations command na ikasa an misyon asin madeploy dawa ano man na oras.
Mientrastanto, marurunduman man na naenot na digde, pigsierto man kan Philippine Coast Guard (PCG) na nakapreparar man sindang magsimbag sa kahagadan na koordinasyon kan DOJ sa saindang mga technical divers tangani sisidon an Taal Lake kun saen inilubong an mga nawawarang sabungero.
Sa presente, padagos man na nakaantabay an Hukbong Dagat kan Pilipinas para sa magigin koneksyon ninda kan DOJ tangani maikasa tulos an retrieval operations sa mga bangkay asin matawan na nin hustisya an mga kaparientes kan mga biktima.
