Nagtaong patanid an Philippine Embassy sa Washington mapadapit sa salang impormasyon na naglalakop sa social media na nagsasabing igwang bagong mga paghihigot an Estados Unidos kontra sa mga dual citizens asin green card holders.
Sigun sa embahada, mayong pagbabago sa mga patakaran kan Amerika mapadapit sa dual citizenship o mga karapatan kan mga lawful permanent residents.
Pig-abisuhan man an mga Filipino na dae magdesisyon nin solo, siring kan pagpapawarang bisa kan saindang Philippine citizenship, basado na sana sa mga dae beripikadong impormasyon gikan sa social media.
Pig-enkaminar man kan embahada an Filipino community sa Estados Unidos na siertuhon na an mga impormasyong nakukua an gikan sana sa official sources kan gobyerno asin likayan na magheras nin mga bakong tama p dae pa na-verify na content.
