NAGA CITY- Pigsierto kan outgoing Mayor kan Naga City na magpapadagos an pagpapatindog kan Center for Safety and Resiliency (CESAR) sa siyudad nin Naga.
Sa nagin paghampang sa mga kagawad kan media ni Naga City Mayor Nelson Legacion, sinaysay kaini na igwa na ining nakaulay na Senador para sa dugang na budget para sa phase 3 kan nasambitan ng center sa masunod na taon.
Kinakaipuhan soboot kaya na maging pusog an pundasyon kan Center for Safety and Resiliency nin huli ta posible man ini na magserbe komo command center kan Naga.
Sigun pa ki Legacion, nakapreparar man an masunod na administrasyon na i-adaptar ini orog na ta makukua digde an public safety complex siring kan headquarters kan BFP, PNP, NBI asin crime laboratory.
Marurumduman, enot nang pigsaysay ni Legacion na an CESAR an sunod na henerasyo na interactive monitoring asin emergency operations center na pigbilog tanganing makapagtao nin solusyon sa mga presenteng problema sa technological requirements kan siyudad.
Apwera digde, mas marekas soboot an pagresponde kan mga magkakanigong opisina kan gobierno sa panahon kan emerhensiya.
Sa ngunyan, padagos pa soboot an pagbilog kaini nin mga programa na makakatabang sa publiko partikular ta ini an matukaw komo Kongresista sa ika Terser Distrito kan Camarines Sur.
