Kinumpirmar ni U.S. President Donald Trump kan nakalihis na Martes (local time) na nag uyon na an Israel sa mga kondisyon para sa sarong 60-aldaw na untok-putukan sa Gaza, asin pigtawan duon sa Hamas na aakuon an kasunduan antes na lumala an sitwasyon.
Nagpepreparar man si Trump tangani makipag meeting ki Israeli Prime Minister Benjamin Netanyahu sa White House sa Lunes, Hulyo 7 kun sae obheto na tabangan an duwang lado na magkasundo para sa pagpapalibre kan mga hostage.
Sigun pa ki Trump, an Qatar magin an Egypt masunad nin pinal na proposal na naglalaom na akuon man kan Hamas nin huli ta kun dae akuon, malala pa an kariribokan sa rehiyon.
Dae na man tinukoy ni Netanyahu an mga detalye kan saiyang pagbisita sa Washington, maliban sa trade deal asin man isyu sa Iran.
Bagaman positibo an pahayag, garu igwa nin alinlangan pa man giraray an Hamas sa alok ni Trump na pig apod kaining “best and final offer.”
Marurumdumang minsan nang nabigo an mga pag-uulay huli sa dae pagkakasundo kan parehong lado sa pagtatapos kan digmaan komo parte kan ceasefire.
Kasabay kaini, nagkaigwa nin pag ulay si Israeli Minister for Strategic Affairs Ron Dermer sa Washington katakod sa posibleng untok-putukan sa Iran, asin iba pa.
Mientrastanto, labi sa 150 mga international humanitarian groups an nangapudan na iuntok na an kontrobersyal na sistema kan pagheheras nin tabang sa Gaza huli sa kariribokan asin naglalalang kadahasan.
Nagpatanid man si Defense Minister Israel Katz kontra sa missile attack gikan Yemen, gikan sa Iran-backed Houthi rebels makaliis na 12-aldaw na gyera.
Sinaysay ni Katz na posibleng kaatubangon man kan Yemen an kapalaran kan Tehran. Mientrastanto, nag promisa man an Houthi na padagos sindang masuporta sa Gaza hasta sa dae natatapos an ginigibong lakdang kan Israel
