Mawot masierto ni Leyte 1st District Representative Ferdinand Martin Romualdez na masustiner an P20 rice program kan Marcos administration.
Rason na ibubusol kaini na mapalangkaw an pondo kan Department of Agriculture o DA asin National Food Authority o NFA sa irarom kan prosopwestong 2026 National Budget.
Sigun ki Romualdez, importante na mapondohan an DA asin NFA tanganing masierto na padagos an mga programa kan administrasyong Marcos Jr,. orog na sa mga pagpapabakal kan P20 kada kilo na bagas.
Pigpunto ni Romualdez na bako sana dapat magin matrayumpo an kampanyang ini kundi dapat magin permanenteng parte kan buhay kan mga Pilipino.
Sa ngunyan mahigot na makikipag-koordinar an Kamara sa Ehekutibo tanganing masiertong magkaigwa nin tamang pondo an DA-NFA, asin maibusol an iba pang lehislasyon na kaipuhan.
Kumpiyansa si Romualdez na maisasa-ley an saiyang House Bill 1 hasta 14, tanganing mas magin abot-kaya an presyo kan bagas asin matabangan an mga paraoma.
Pigtawan-duon ni Romualdez na importanye na matawan nin bastante na tabang asin suporta an mga paraoma na iyong pigkokonsiderar na backbone kan agrikultura.
Apwera man sa subsidiya, sinaysay ni Romualdez na importante na igwa man panghaluyang pamumuhunan, irigasyon, modernonh makinarya, mga makatuwirang pautanh, asin post-harvest facilities.
Enot nang sinaysay kan DA na target nindang mag-abot sa 15 milyon an mga benepisyaryo kan baratong bagas sa 2026 , mantang 60 milyon sa katahawan kan 2028, sa paagi kan Kadiwa as iba pang partners.
