Nagtutubod si Senator Joel Villanueva na mas dakula asin mas panghaluyan an epekto nin living wage kumparar sa pigheras na ₱50 na dagdag sahod sa Metro Manila.
Bagaman good news na maikokonsidera para sa mga obrero kan National Capital Region (NCR) an umento sa sahod, sa hiling kan senador, mas magkakaigwa nin “lasting impact” sa gabos nin mga obrerero an ibubusol na Living Wage Act huli ta matatabangan kaini an mga regional wage boards na matalaan nin disenteng minimum wage level sa saindang nasasakupan.
Sigun ki Villanueva, dae talaga pantay-pantay an sahod kan mga obrero sa mga rehiyon orog na an mga nasa hararayong lugar na kulang sa imprastraktura, didikit an mga negosyante o locators asin man dikit an numero kan mga negosyo.
Siringpaman kun igwa nin universal formula sa paagi kan pag-compute kan paglangkaw sa sweldo kan mga obrero, importante na igwang living wage criteria tangani masimbagan an kinakaipuhang sweldo asin man tunay na makapamuhay nin marahay an mga obrero.
Katakod digde, pigsunad ni Villanueva an Living Wage Act na pagtalaan nin living wage standard sa mga rehiyon kun saen nakakasiguro na nakakakakan nin bastante, igwa nin pakarhay na istaran, edukasyon para sa mga aki, salud asin naisasaalang-alang an kapakanan kan mga obrero.
