Photo © web

Aram na soboot kan Department of Justice (DOJ) an lugar sa Taal Lake kun saen pig-apon an mga nawawarang sabungero.

Sa entrevista ki Justice Secretary Crispin Remulla, may “lead” asin mga saksi na makapagtutukdo kan eksaktong lugar na sisisidon tanganing mahanap an lawas kan mga nawawarang sabungero.

Sigun ki Remulla, igwa naman sinda nin mga impormasyon dapit sa planong pagsasagibo nin “diving operation”.

Siringman, aminado an sekretaryo na bako ining suba-suba nin huli ta nasa 200 square kilometers an hewas kan Taal lake kun saen pigtutubodang piglubong an mga biktimang sabungero.

Advertisement

Marurumdoman, pigsiwalat ni alyas “Totoy” o Julie “Dondon” Patidongan an alegasyong na nailubong na soboot an mga ini sa parte kan Taal lake. Determinado man an DOJ na maaraman an katotoohan dapit sa pagkawara asin paghahanap sa bangkay kanmga sabungero kun ini man an totoo.

Mientrastanto, pigheras man ni Remulla na an planong pagsasagaibo nin diving operation an dae pa muna maisasakatupadan. Ini an huli sa kamogtakan kan panahon kaya nauktaba an operasyon na pagsisid na iyong saindang pigpaplano tanganing mahanap an lawas kan mga nawawarang sabungero.

Sa ibong kaini, pigsierto ni Remulla na gigibuhon ninda an gabos tanganing maresolbar sana an kaso kan mga “missing sabu­ngeros”.

Saro na digdi an pakikipag-koordinar sa nasyon kan Japan huli sa sistema ng “diving­ ­operation” an kina­kaipohang isagibo.

Advertisement